Шурӯъ аз шоми дирӯз дар масири роҳи Душанбе – Чанок, бештар аз километри 62 то 84 –ум  боришоти шадиди барф ба амал омад.  Кормандони филиали ширкати саҳомии “Иновейтив Роуд Солюшнз ЛТД” дар Ҷумҳурии Тоҷикистон ҷиҳати таъмини ҳаракати муназзаму бемонеаи воситаҳои нақлиёт  дар ин ҷода бетаъхир чораандешӣ намуда, бо истифода аз имконоти мавҷуда фаъолияти хешро беш аз пеш вусъат бахшида, тамоми кӯшишҳоро ба харҷ доданд, ки ҳаракати воситаҳои нақлиёт таъмин бошад. Дар навбати аввал, техникаҳои филиали Ширкат роҳро аз барф тоза намуда, пошидани маводи зидди лағжиш таври густурда амалӣ шуд. Масъулин аз он изҳори нигаронӣ менамоянд, ки бо вуҷуди ба роҳ мондани корҳои фаҳмондадиҳӣ, як идда ронандагон бе омодагӣ (манзур набудани занҷир, аз ҷиҳати техникӣ ҷавобгӯйи талабот набудани ҳолати техникии  воситаи нақлиёт ва ғайра аст) ба роҳ мебароянд. Дар натиҷа, чунин ронандагон дар роҳ ба мушкил мувоҷеҳ гардида, барои ҳаракати дигар воситаҳои нақлиёт монеа эҷод менамоянд. Ба “шарофат”-и чунин ронандагони бемаъулият  кор ҳатто то ҷое мерасад, ки ҳаракати воситаҳои нақлиёт як муддат манъ мегардад. Ин ҳолатро ашхоси аз асли воқеа бехабар нодуруст бозгӯйӣ намуда, ба фаъолияти кормандони  “Иновейтив Роуд Солюшнз ЛТД” дар Ҷумҳурии Тоҷикистон  рабт медиҳанд.

Дар раванди  омодагиҳо ба мавсими сармо дар навбати аввал таваҷҷуҳ ба сатҳи омодагӣ ва ҳолати кории техникаву таҷҳизот зоҳир гардида, ба қадри кофӣ маводи зиддилағжиш ва сӯзишворӣ захира шуд. Ҳамрадиф бо ин, кормандон бо сару либоси зимистона таъмин шуда, барои фаъолияти муназзами онҳо дар макони мустақаршудаашон  ба миқдори зарурӣ ангишт ва ҳезум дастрас шудааст. 

 То ин замон филиали Ширкат барои фаъолият муназзаму пурмаҳсул дар фасли зимистон 10550 метри мукааб қум, 1010 тонна намак,  227270 литр сӯзишвори дизелӣ, 66 тонна ангишт, 51,4 метри кубӣ ҳезум ва  ба қадри зарурӣ сару либоси зимистонаи махсус барои кормандон захира карда,  ин омил имкон медиҳад, ки рисолати ширкат - нигоҳдории роҳ дар сатҳи хуб ва сифати баланд амалӣ гардад.  Мавҷудияти зиёда аз 181 мошину техникаи замонавӣ барои нигоҳдории роҳ далели возеҳи он аст, ки ширкат дар нигоҳдории роҳ  хеле фаъол аст. Маҳз ҳамин техникаҳои пуриқтидор замина фароҳам оварданд, ки ҳатто рӯзҳои сербориши фасли зимистони солҳои пеш  ҳаракати нақлиёт дар роҳ  таъмин гардад.