Дирӯз бародари гиромӣ Некбахт Ҷабборов дар поварақи яке аз  матлабҳои  дар саҳифаи фейсбукии филиали Ширкат ҷойгиршуда ба кашидани хатҳои уфуқӣ таваҷҷуҳ зоҳир намуда,  аз набудани онҳо дар баъзе қитъаҳо нигаронӣ кард.  Дар посух ба ин бародар шарҳ додем, ки минтақаҳое, ки дар онҳо муваққатан хати уфуқӣ вуҷуд надорад, ба тозагӣ таъмир шуда, ҳатман дар ояндаи наздик чунин хат кашида мешавад.

   Мо дарк мекунем, ки мавҷудияти чунин хат яке аз талаботи асосии бахши роҳсозӣ буда, саҳми хатҳои уфуқӣ дар таъмини бехатарии ҳаракати воситаҳои нақлиёт бориз аст ва роҳро зебову назаррабо менамояд. Биноан, кормандони филиали Ширкат масъалаи мазкурро мунтазам мадди назар қарор дода, фаъолияти худро дар робита ба кашидани чунин хатҳо тавсеа бахшидаанд.

  Шоистаи зикр аст, ки солҳои охир, дар заминаи тадбирандешиҳои саривақтӣ аз ҷониби кормандони намояндагиҳои минтақаи Варзоб, Зарафшон ва Суғд дар масофаи садҳо километр хатҳои уфуқӣ аз нав кашида шуданд. Муҳимтар аз ҳама, ин иқдом бо истифода аз  ранги босифат ва тавассути  техникаи замонавӣ амалӣ шуда, кафолати муддати зиёд беосеб монданаш таъмин аст.

  Чунин тарзи кор ба ҳукми анъана даромада, ҳар сол чунин иқдомот бо фаро расидани фасли гармо шурӯъ гардида, баҳри ҳаракати нақлиёт ва бехатарии ронандагону мусофирон равона шудааст.